អីម៉ែលពីអតីតសិស្សជំនាន់ទី១ (អត្ថបទទាំងស្រុង)

ខ្ញុំជាអតីតសិស្សជំនាន់ទី ១​ ប្រឡងឌីប្លូមឆ្នាំ ១៩៦៥​ សូមធ្វើសេចក្តីសង្កេតខ្លះ លើ​ភាគដំបូង រហូតដល់​ឆ្នាំ ១៩៦៥។

ចាប់ផ្តើមកសាងក្នុងឆ្នាំ ១៩៦១ ហើយបានកសាងរួចរាល់ក្នុងឆ្នាំ ១៩៦៣ បើកទ្វារទទួល សិស្ស ក្នុងឆ្នាំសិក្សា ១៩៦៣/៦៤។ អាគារនេះធ្វើអំពីសំណង់បេតុង មាន ២ ជាន់ ១០​បន្ទប់ សង់បណ្តោយថ្ងៃ ចំណាយថវិកាអស់ ២០ ០០០​ដុល្លារ ។ ២ ឆ្នាំក្រោយមក អាគារនេះ ត្រូវបានសម្ពោធ​នៅថ្ងៃទី ៣០ ខែ ឧសភា ឆ្នាំ ១៩៦៥ ក្រោម អធិបតីភាព ដ៏ខ្ពង់ខ្ពស់របស់ ព្រះប្រមុខរដ្ឋ សម្តេចព្រះ នរោត្តម សិហនុ ។​ ក្នុងឱកាសនោះ ព្រះអង្គបានប្រទានព្រះរាជ អំណោយឧបត្ថម្ភចំនួន ១៥០ ០០០ រៀល ស្មើនឹង ៤២៨៦  ដុល្លារ (សម័យនោះ ១ ដុល្លារ = ៣៥ រៀល, មាស ១ តំលឹង ៣២០០​ រៀល, គុយទាវ ១​ចាន ៤ រៀល) ។នេះជាវិជ្ជាស្ថានមធ្យមសិក្សាទី៤ នៃខេត្តបាត់តំបង បន្ទាប់ ពី វិទ្យាល័យព្រះមុនិវង្ស, អនុវិទ្យាល័យ អៀបឃុត, នេតយ៉ង់ និង សម្តេចឪ សិរីសោភ័ណ​ ។

ឆ្នាំសិក្សា ១៩៦២/៦៣  ថ្នាក់ទី ៦ មាន​២ថ្នាក់   (នៅសាលាយុងណា)។​

ឆ្នាំសិក្សា ១៩៦៣/៦៤  ថ្នាក់ទី ៦  មាន​៣ថ្នាក់  ថ្នាក់ទី ៥ មាន២ថ្នាក់ ថ្នាក់ទី ៤ មាន ១ថ្នាក់ ។​ឆ្នាំនេះមាន បង្កើតថ្នាក់ទី ៤ ដោយ​ទទួលសិស្ស ដែលមានកំណើតនៅមង្គលបុរី ​ពី អនុវិទ្យាល័យ ឬ វិទ្យាល័យនានាខាង បាត់តំបង និង ពីអនុវិទ្យាល័យសម្តេចឪសិរីសាភ័ណ ។ 



 

ឆ្នាំសិក្សា ១៩៦៤/៦៥ ថ្នាក់ទី ៦ មាន​៣ថ្នាក់ ថ្នាក់ទី ៥​មាន៣ថ្នាក់  ថ្នាក់ទី ៤ មាន២ថ្នាក់​ ថ្នាក់ទី​ ៣ មាន១ថ្នាក់ ។​ ឆ្នាំនេះមាន សិស្ស ចំនួន៣៦០នាក់ ។ អនុវិទ្យាល័យ យើងបាន​បញ្ជូន​សិស្ស​ថ្នាក់ទី ៣ទៅប្រឡង ឌីប្លូម ជាលើកទី១។ ក្នុងចំណោមបេក្ខជន៣៦នាក់អ្នកប្រឡង​ជាប់មានចំនួន៣៣​នាក់គឺ៩១,៦៧ ភាគរយ​។ សូមជំរាបដែរថា ទិន្នផលមធ្យមថ្នាក់ជាតិ ក្នុងសម័យនោះ ប្រមាណពី ៣០​ទៅ៤០ភាគរយប៉ុណ្ណោះ។ ពេលនោះ អាគារB​មិនទាន់សង់ទេ​គណៈកម្មការ កំពុងរៀបចំ​គំរោងសង់​នៅឡើយ។

ទំព័រ​៣១​ នៃ ទស្សនាវដ្ដី Kambuja ខែមិថុនា ១៩៦៥

“ខ្ញុំបានអានប្រកបដោយរីករាយនិង​យកចិត្តទុកដាក់នូវប្រវត្តិវិទ្យាល័យមង្គលបុរី​។ ខ្ញុំសូមថ្លែងនូវ សេចក្តីសរសើរចំពោះកិច្ចការដ៏ប្រពៃនេះ ជាប្រយោជន៍​​ ដល់​អ្នកចង់ដឹងយល់​ពីស្រុកយើង. ”

សូមលោកក្មួយទទួលនូវសេចក្តីរាប់អានដ៏ស្មោះស្ម័គ្រពីខ្ញុំ ។

ដោយសេចក្តីរាប់អានដ៏ស្មោះស្ម័គ្រ។

BUN Chamroeun sok 

sok.bun@gmail.com

First Promotion from Mongkol Borey Highschool